Plantun de Prouvènço

Pèr coumpara dos planto d'encò nostre

Crepis bursifolia & Leptodon smithii

Crepis bursifolia

Asteraceae Compositae

Noms en français : Crépide à feuilles de capselle, Crépis à feuilles de capselle.

Descripcioun :
Aquéu lachassoun que nous vèn d'Itàli èi devengu proun coumun dins d'ùni relarg de Prouvènço. Se recounèis à si fueio basalo verdalo, un pau espesso, proun penado e que s'acabon emé de pichot benc blanc (fotò). Lou cor de la planto sèmblo coume enfounça dins lou sòu que la racino èi proun forto. Li flour coumpausado soun fino e aloungado.

Usanço :
Lou lachassoun d'Itàli nous vèn endrudi nosto ensalado champanello. La poudès culi tre li plueio d'autouno fin qu'au printèms.

Port : Erbo
Taio : Pancaro entresigna
Fueio : basalo
Tipe bioulougico : Teroufite
Cicle bioulougico : Planto de l'an

Gènre : Crepis
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Printèms Autouno

Sòu : Ca
Autour basso e auto : Pancaro entresigna
Aparado : Noun
Remarco : Ensalado champanello

Liò : Champ - Escoumbre e proche dis oustau - Camin
Estànci : Termoumediterran à Coulinen
Couroulougi : Pancaro entresigna
Ref. sc. : Crepis bursifolia L., 1753

Crosso-de-Smith

Leptodon smithii

Neckeraceae

Nom en français : Leptodon de Smith.

Descripcioun :
Aquelo mousso pluroucarpo trachis majamen sus li pège d'éuse e de roure. Douno de mato plato pu o mens grando, li tijo soun un à dous cop penado. Bagnado fai de tijo plato alor que seco douno de crosso que sèmblon pièi de cascavèu. La fueio èi redouno-óublougo emé de bord lisc. La costo fai aperaqui li tres part dous de la longour de la fueio.

Usanço :
I'a pas trop pèr s'engana emé la crosso-de-Smith que se recounèis pulèu bèn. Es uno meno proun coumuno au nostre e dins lou relarg mediterran. Au contre devèn raro à l'uba, pèr acò èi marcado sus listo roujo categourìo LC valènt à dire soucit minour.